喜歡研究堪輿、行山睇山脈既朋友, 應該聽過"橫看是嶺側成峰"呢句嘢. 坦白講, 我初初真係分唔開‘峰’同‘嶺’有乜分別, 咪即係同一樣嘢囉! 都係指個山頂啫! 吓! 乜原來唔同架咩? 係喎! 睇吓八仙嶺, 成排山好似個屏風打橫行咁就稱為‘嶺’, 八個突出既部份都各自有獨立山名, 就叫‘峰’.
風水風水, 講風水點離得開‘山’同‘水’呢? 上次山川四驅車之旅, 從四川起點去到西藏拉薩終點, 穿越林芝尼洋河, 經拉薩河進入拉薩之際, 楊會長講解尼洋河、拉薩河與雅魯藏布江幾條河流既關係, 曾經提過南迦巴瓦峰; 本來由西至東流既一條河, 點解忽然180度大轉彎, 流咗落曼加拉呢? 就係由南迦巴瓦峰地形所影響. 嗰時不明所以, 求其強記就算啦, 反正以當時自己既level, 再講深啲都唔會明.
第二次山川旅遊巴後藏之旅,
終於可以聽埋下集大結局.
當旅途去到‘聖湖’瑪旁雍措與‘鬼湖’拉昂措之間時, 楊會長話: “呢兩個湖本來係一個湖, 中間其實係由崗仁波齊衝到納木那尼峰既過峽, 因而拱起咗, 將一個湖分開咗兩個湖, 稱為‘天池過峽’”. 嘩! 呢課值錢咯! 你睇納木那尼峰, 點只係玄武垂頭, 個氣勢簡直好似獅子搏兔, 衝勁幾咁強勁? 未到過後藏之前, 我一直以為珠穆朗瑪峰係世界祖山, 中國龍脈之源頭, 佢係全世界最高喎! 乜原來唔係咩? 於是請教楊會長, 會長話喜瑪拉雅山山脈同香港八仙嶺有啲相似, 從龜頭嶺向上衝出一個黃嶺, 從黃嶺繼而橫向衝出兩旁山脈, 一邊向西走向九龍坑山, 另一邊向東衝出一個八仙嶺, 八仙嶺第一個山峰叫純陽峰, 而崗仁波齊衝出第一個高峰就係納木那尼峰; 八仙嶺最終山峰叫仙姑峰, 而喜瑪拉雅山最後一個峰原來就係… (登~登~登~~~躉)
令到雅魯藏布江大轉彎既南迦巴瓦峰.
咦! 聽落八仙嶺同喜瑪拉雅山山脈真係好相似噃! 佢哋係孖生兄弟? 咁又唔係噃! 會長話雅魯藏布江上游係馬泉河, 而馬泉河源頭係崗仁波齊, 基本上喜瑪拉雅山北邊及東邊完全被馬泉河加雅魯藏布江所包圍, 西邊又被孔雀河所界, 界水則止, 所以喜瑪拉雅山山脈情意完全不為我哋所用… 咦! 好反骨吓喎!
文: 鄺偉雄
圖: 互聯網
