若果你對內家拳有興趣, 我誠意向你推薦"逝去的武林"一書. 個人喜歡呢本書, 並不因為書中有甚麼武功秘笈; 相反, 此書的主旨係關於形意拳門一點兒逸事, 對於形意拳術, 只不過係蜻蜓點水式, 略略帶過, 基本上與我所修習的太極拳扯不上關連. 當初睇呢本書, 亦只不過出於好奇, 想一窺形意拳歷史.
形意拳、八卦掌、太極拳雖被稱為三大內家拳, 但從拳法套路表面去睇, 三種拳術似乎毫無共通點. 驚喜的是, 越揭呢本書, 對書中所提及既形意拳技巧越覺得有似曾相識感覺. 原來, 三家拳法及套路表述與施展雖然不同, 核心卻差不多一樣, 所謂異曲同工, 殊途同歸.
由於武俠小說為求吸引讀者, 把內家拳誇張失實地作為小說情節上的一種必然手段, 一般人誤以為懂內家拳就係絶世高手, 亦有人以為懂氣功就係內家高手, 竟然有人把氣功與內家拳劃上等號….若然屬實, 豈不是所有氣功師就係內家高手(當然氣功師內亦存在著隱世高手), 修練氣功既朋友就通通都懂得內家拳?
其實, 修習內家拳係精、氣、神既修練, 與修練氣功者同樣需要經過練精化氣, 練氣化神, 練神還虛階段; 因此, 修習內家拳同時不經意地也正在修練‘氣’功, 請不要神化‘氣’, 氣只不過係內家拳既副產品. 可惜, 有某啲練習太極拳既朋友倒果為因, 誤以為修練太極拳以練氣功為先驅, 以為能以氣催化動作而沾沾自喜. 不要忘記, 太極拳經: “在氣則滯”.
逝去的武林一書內提及過: “太極十年不出門, 形意一年打死人”, 作者李仲軒前輩話: “練形意拳一年可以打死人, 但同時正在打死自己.” 咦! 咁熟既? 倚天屠龍記金毛獅王既七傷拳囉. 據作者所述, 練形意拳應該係以修內為主(所謂氣歛入骨, 神不外露), 若以打人為主, 形意有句“遇敵好似火燒身”, 神意氣會自然地向體外衝咗出去, 經常入不敷支, 外強中乾, 想唔提早收工都幾難? 原來, 練形意拳同樣如練太極拳一樣地也需要長年累月既修練.
內家拳點解被稱為內家拳呢? 好行貨一句: “內家拳動作以身體內既流動能量作為駕馭”. 嘩! 真係好行喎! 事實就係咁簡單… 不過講就簡單, 若要身體內有流動能量既感覺, 非要練四五年以上不可.
點解三大內家拳外形上表達不一樣, 內裏卻同一個核心呢? 逝去的武林書內提過: “太極如摸魚, 形意如捉蝦, 八卦如推磨”, 十分貼切又生動地描述咗三大內家拳特點, 摸魚、捉蝦、推磨三個唔同動作, 都同樣先產生‘意點’, 有咗意點, 身體(意念)自然開合地配合意點而後施展動作, 發出暗勁(用蠻力係捉唔到魚蝦, 用拙力推磨會關節磨損). 電訊行業內有講七個layer (OSI 7 layer), 全球各國各自發展自家不同系統, 呢啲系統點樣能夠連繫埋一齊呢? 大家樽守 OSI 7 layer 標準. 太極拳、形意拳、八卦掌就如7個layer當中最底層部分, 一個係frame relay, 一個係X.25, 一個係ATM, 最終達到Application layer (技術/技巧/技擊), 中間幾層就係共通核心 – 流動能量, 或者可以稱佢為內功(流動能量既基本功).
文: 鄺偉雄
沒有留言:
張貼留言