又係西藏行 ??? 悶唔悶啲呀?

啲同學仔寫論文? 仲未見佢哋發佈文章? (喂! 又係你? 悶唔悶啲呀?) 嘻嘻, 我係旁聽生, 寫嘢唔使咁嚴肅, 講錯唔怕俾人笑, 冇包袱吖嘛! 楊sir 舖頭新開張, 吹吓水撐吓場囉.... 同學仔搏1st Hon, 交功課要慢工出細貨囉.... 喂! 等緊你哋啲貨呀~ 呀~ 呀~

西藏, 應該好多人都去過, 講風景好多人都見過, 所以我講風景以外既話題, 悶吓大家囉....

上次講過, 山川第一次搞西藏遊, 四部四驅車從成都出發先去汶川, 再從天路18彎跨上三千米高山, 沿住318國道經雅安, 甘孜, 途中去過幾多過小鎮? 幾多個四~五千米高山? 通通都唔記得哂, 只記得中途忽然離開318國道, 專程直落稻城亞丁山. 好多人講"香格里拉"(Shangri-La), 都會話雲南麗江中甸就係香格里拉; 但當你去過亞丁, 你必定同意亞丁山就係Shangri-La, 當地人心中既"香巴拉".

亞丁山風景靚唔在講, 最正當然係此行主要目的, 一探巒頭山脈走勢啦! 會長係咁講解個金字塔形亞丁山點樣點樣? 背靠土形山又點樣? 慘! 我嗰時對呢科嘢仲係十下十下, 佢講啲嘢我真係唔明... 不過還好, 終於理解到乜嘢係入山尋水口.... 嗰次我哋嘗試去揾亞丁山背後過峽處, 喺3~4千米高山上上上落落, 體能比喺香港行山低於一半以下, 由於時間緊迫, 只欠少少, 就少少時間啫, 離開過峽處還欠少少路程, 失望而回囉....

若果你問我喺亞丁山入邊有冇印象最深刻既事? 有! 一件瘀事.... 咪就係喺餐館俾老闆娘痛罵一頓囉! 香港人自從沙士之後, 特別注重衛生(你睇依家好多人一入lift, 嗱嗱林衝去最入位置, 詐詐帝唔鍬關門制, 有啲仲叫你幫佢鍬埋佢嗰層添), 去茶樓酒館習慣洗杯洗筷子, 所以好自然一坐低, 我哋就開工洗乜洗物, 點知老闆娘見到我倒水, 就破口大罵, 原來高原地方煮嘢去唔到沸點, 煲水要用好大能源, 佢見啲滾水唔係飲, 用來洗嘢, 痛心囉....

離開亞丁山, 齊齊嘆魚餐, 你睇我哋食得幾招積! 魚~全部都係魚~全部都係魚~ 喺咁凍既氣温下打邊爐, (香港係夏天, 勁熱!)你哋唔恨得咁多咯~ 不過, 原來當地人係唔食魚架! 原因? 佢哋有水葬囉! 啲魚肚裏邊可能有自己親人喎! 大鑊! 個個食到肚滿腸肥添~~~ 中招!

中途由318國道轉落稻城, 回程當然如何的來, 如何地回去啦, 沿著來路回歸318國道, 正正式式入藏喇! 嘩! 天路七十二拐呀! 嘩! 通麥天險呀! 唔好意思, 自從2016年通麥隧道通車後, 你未去過的話, 此後冇得親身去感受天險咯.... 拜拜!

入藏途中要經過三江並流, 橫斷山脈既三江喎! 你試過一口氣走哂瀾滄江, 金沙江, 怒江未? 會長話:"開始數喇! 記住1, 3, 5, 7... 部車上幾多座山? 中間數嗰條脈就係幹龍, 左右兩邊係護龍" 從對講機傳來會長既說話....

三江過後, 直達林芝, 終點拉薩.... 全程盡興而回.

文: 鄺偉雄
圖: Derek