二三十年前, 喜多郎嗰首音樂打響咗絲綢之路呢個名堂, 於是同兩位電話公司工友一齊走去行絲綢之路, 坐咗四五日火車, 到步時已經係深夜喇... 四周烏燈黑火, 鬼影都冇隻..... 以上通通與本文無關, 有關既只係當時一句豪情壯語: "下一站我哋要去西藏..." 如是者就過咗幾十年, 諗住都冇乜機會可以去西藏咯, 前幾年山川風水學會楊會長話會組隊去西藏, 於是嗱嗱林舉手報名都'泥'唔切啦! 該行由於租用四驅車, 人數不能太多... 好彩舉咗手表咗態啫! 以上情節都係與本文無關.... 喺回程既飛機上遇上一班德國老人家, 佢哋show 啲相俾我哋睇.... 嘩! 正呀! 珠峰大本營咁高佢哋都去到? 啱啱睇完'珠峰浩劫'嘛! 會長話下一程不如去後藏... 立即舉定手啦... 一等, 第二年話去北岳.... 再過多一年, 等到會長話打算去後藏, 舉手都舉唔切啦.... 終於等到喇....
若果以當年想法, 我哋幾位老電工友自由行去西藏, 正路應該會以拉薩為終點, 曾經睇過一本旅遊書講過可以喺拉薩租四驅車遊後藏, 但使費十分貴, 而且要夠人數分擔價錢, 可行性機會微, 若果以當年自由行去後藏機會不大.
今次跟山川行後藏, 驚喜一個一個來, 若以一般跟旅行團計, 去到珠峰大本營已經好滿足, 收哂貨. 但山川此行, 來到珠峰大本營只不過係開始..... 若果你對風水巒頭有興趣, 你未到過亞里, 一定想像唔到, 原來須彌山就係岡仁波齊, 何解岡仁波齊會受多個宗教視為神山? 被公認為係世界之中心... 從地圖一望, 圍繞岡仁波齊從東南西北各出現四條河流"獅泉河""象泉河""馬泉河"孔雀河"分別流向巴基斯坦, 印度, 尼泊爾, 孟加拉等國... 就算不從宗教出發, 這幾國水源都出自此山, 神山地位喺佢哋心中無可代替.
文: 鄺偉雄
沒有留言:
張貼留言