聽講, 每座高山都有山神守住, 尤其是特別有靈氣既高山, 例如日本人視富士山為神山, 雲南麗江人拜玉龍雪山山神等等... 傳說山上不但有山神, 還有山精遊魂 (喂! 咪睇咁多聊齋啦!).... 以前我會覺得係落後民族既迷信觀念...
今日跟山川行山, 落山時有位朋友受傷, 令我回想起幾年前跟山川行'龍山'時親身遇到一件奇怪事情... 話說當日一馬當先落到半山一塊平地上, 正在等候大隊之時, 忽然一腳後踭被撞至向前踏上一步... 野狗? 轉身一望, 後面甚麼也沒有喎.... 姨咦! 好似唔受歡迎噃, (醒水啦)咪企遠少少囉... 咁大力, 究竟係乜東東呢? 諗極都唔知俾乜嘢撞, 總之係半圓形物體, 軟林林咁囉(一兩年後先醒起係動物鼻哥, 狗鼻之類), 等到大隊過咗一大半, 最後嗰批剛剛到步, 忽然有位女仕喺大約位置無喇喇拗柴... 嘩! 真係咁邪? 山上原來真係有山精, 點到我唔信?
靜雞雞話俾你知, 以上事情與本主題無關, 今次主題仍然係講川藏行... 哈哈, 你哋中伏呢? (妖! 又係西藏, 你唔厭咩?) 上次賣咗個關子, 喺離開神山亞丁(上圖)之後, 有位靚女要求跟會長同車去拉薩....
喂! 喂! 唔係呢個呀? Sorry, 嗰位靚女冇相睇... 呢張相係途中某個景點遇到既靚女, 與本故事無關.... 事實係好殘酷既, 嗰位靚女唔係要mark住會長, 實情係要跟會長架車既司機大佬去拉薩... 車隊班司機大佬緊係襯我哋入咗神山(亞丁山)嗰晚去咗威啦... 嗰位小姐係咪(花街)神女就唔知, 艷女就一定啦, 唔係點電到車隊個亞頭暈陀陀呢? 車隊亞頭咪係會長架車個師傅囉, 大佬出到聲, 諗住唔會托手掙啦... 嘩! 呢吓真難拆.... 唔係一程半程路, 仲有好幾日車程, 架車坐多個人喎! 即係明屈唧.... 當中刪去幾萬字點拆? Plan B點做? 總之難拆, 最後緊係NO WAY啦.... 面左左就實有啲喇... 不過全程有賴呢位大佬, 手車技術一定要讚囉... 例如喺通默天險開路, 幾乎得三個碌黏地既情況下, 喺懸崖邊扒頭, 喺後面既我哋睇到毛管頭髮楝起哂囉! 又喺某條主路有交通意外, 車龍塞到好長好長, 水蛇春咁長, 佢竟然有本事喺車龍中間左穿右插, 跑到好前既某處揾到一塊冇人注意到既地方, 仲可以同時容納四架車, 整個車隊泊埋一齊, 道路一開通立時幾乎'四車當先'離開塞車現場, 慳番幾粒鐘時間....
你睇呢位司機大佬 (咪住, 佢唔係車隊大佬呀!), 唔知佢車上有幾多往生咒呢? 每到一個高山就一大叠一大叠往上一抛.... 好多四川人跟西藏人宗教差不多, 更何況呢幾位本來都係藏民.
我哋途中經過某世達賴既出生地, 有隊友(好似係關師傅)無意中影到一張奇怪相, 唔知大家覺得呢張相係光源問題定係乜嘢原因呢? 留意吓, 橙色頂部好似一支幡咁喎!
其實我自己喺某間旅館都影到幾張奇怪相, 不過唔賣廣告咯... 總之, 高山之上, 可能天比高啩! (以前啲國師都要起個觀星台觀察天象) 靈氣相對地高啲啩! 總之, touch wood 最後大家安全到達西藏拉薩.... 睇吓! 布達拉宮就喺後面咋! 羡慕哩!
沒有留言:
張貼留言